|
|
اختاري أقمشة منزلك بعناية وامنحي منزلك روح جديدة
|
تُعتبر الأقمشة اللى بنستخدمها في ديكورات البيت ، من أهم عناصر التغيير، اللي لو أتقنا اختيارها هنوصل لنتائج رائعة تُضيف روح جديدة على عناصر الديكور الثابتة كلها.
خامات أقمشة التنجيد والستائر كتير جدا ومتنوعة ، فيه الأقطان والأصواف والحرير والقطيفة والشمواه والجلود، وفيه المنقوش والمقلم والسادة، بالإضافة إلى الأقمشة ذات السطح اللامع وأخرى غير لامعة.
ومن أكتر الأفكار اللى كتير من الناس بتفضلها في تنفيذ ديكورات منازلهم، هي الألوان الهادية في عناصر التصميم الثابتة وهي: "الأرضيات والحوائط والأسقف"، وممكن التغيير في ألوان الأقمشة اللى هتنفذى بيها زى الستائر وأقمشة تنجيد قطع الآثاث و"خُدديات" الكنب والأرضيات والسجاجيد والتابلوهات، والطريقة دى بتعتمد بشكل رئيسي على ألوان المنسوجات في إظهار المكان بالصورة الملائمة.
 |
| طقم بوكيهات قطيفة تركى من أقمشة الكيلانى متوفر بألوانه |
مفيش شك أن القماش له دور كبير في إظهار إضاءة المكان أو إخفائها، بمعنى أن الأقمشة القطنية والكتان تمتص الضوء، عشان كده تستخدم معاها إضاءة عالية، لكن الأقمشة الحريرية بيكون سطحها عاكس للإضاءة، عشان كده عادة بنستخدم معاها الاضاءة الضعيفة والخافتة لأنها تساهم في إظهار الإضاءة بشكل أكبر.
وممكن نمزج بين خامتين من القماش، ده ممكن يفيد فى النتيجة النهائية لشكل طقم الصالون أو الأنتريه، فمثلا لو استخدمنا في صنع الكنبة قماش من الكتان هيكون جميل جدا اختيار "الخُدديات" من قماش لامع زى : الأورجانزا أو التافتاه، فالتضاد ما بين نوعي القماش يظهر مميزات كل خامة.
فيه كمان وظيفة تانية مهمة للمنسوجات غير أن ألوانها وزخارفها تستخدم للوصول لمظهر جمالي معين، فهي تعمل على تنظيم الإضاءة زى الستائر يمكن الإستفادة بها في تقسيم الفراغات بداخل المنزل، وفيه أنواع أخرى من الأقمشة تساهم في العزل الصوتي بداخل المساحة المحددة بها.
 |
| ستائر مميزة لمنزلك من تصميم الكيلانى للمفروشات بدمياط |
ومن مميزات استخدام أنواع الأقمشة المختلفة أنها أسرع خامة ممكن تغييرها في أثاث المنزل، والتجديد من خلالها يحدث بسهولة وسرعة، فتغيير لون كسوة الصالون يغير شكل المنزل، وتغيير قماش الستارة أو "خُدديات" الأرضيات أو تغيير السجادة يضفي لمسة من الجمال، ودى تعتبر مجموعة من الطرق البسيطة عشان تعمل تغيير سريع لشكل المنزل عند احساسك بالملل من ألوان الغرف.
وتختلف أنواع الأقمشة مع اختلاف فصول السنة، ففصل الشتاء غالبا نستخدم الأصواف والقطيفة والشمواه، وفي الربيع والصيف نستخدم الأقمشة الحريرية والأقطان والكتان لأنها تعمل على التقليل من درجات الحرارة.
وبشكل عام لا يفضل استخدام الأقمشة الصناعية في غرفة المعيشة لأنها تتسبب في مضاعفة الإحساس بالحرارة، ودا له تأثير سيئ على الحالة المزاجية، خصوصا أن غرفة المعيشة هي اللى بنقضى فيها أكثر الأوقات في البيت.
ولازم تاخدى بالك من الأقمشة ذات الغرز الواسعة لأنها مبتتحملش كتير وعمرها قصير، عشان كده بلاش تختاريها فى الأماكن التي بتقضى فيها انتى واسرتك أغلب الأوقات.
وكقاعدة عامة مش كل الأقمشة الغالية كويسة ، ولا كل الرخيصة سيئة، ولكن لازم وانتى بتشترى أقمشة بيتك تختارى محل مشهور بجودة أقمشته واحذرى ان تستشيرى المنجد وتطلبى منه ترشيح محل معين للأقمشة لانه غالبا معظم المنجدين واصحاب الورش بيتعاملو بنظام العمولات والسمسرة مع محلات الأقمشة فيرشحلك المحل اللى بيعطيه عموله على كل زبون يجي من طرفه وهيستغل اعتمادك على مشورته ويقنعك ان دى افضل الأقمشة وافضل الأسعار وطبعا انتى اللى هتدفعى العمولة دى زيادة على تمن القماش الأصلى بدون ماتنتبهى.
